Beleri i pandehur/ Banderola në Himarë: “Drejtësi për masakrën e Peshkëpisë”
Në Himarë dhe përgjatë zonës së Vlorë janë shfaqur banderola me mbishkrimin: “10 Prill, drejtësi për masakrën e Peshkëpisë”, duke rikthyer në vëmendje një nga ngjarjet më të debatueshme të viteve të tranzicionit.
Mesazhi i vendosur në disa pika kërkon drejtësi për ngjarjen e ndodhur në Peshkëpi, ku humbën jetën dhe u shpallën dëshmorë të atdheut Fatmir Shehu dhe Arsen Gjini.
Në përmbajtjen e banderolave përmendet edhe emri i Fredi Beleri, i cili në të kaluarën është akuzuar në lidhje me këtë ngjarje.
Vendosja e këtyre banderolave ka ngjallur reagime dhe pritet të sjellë diskutime të reja publike, sidomos në këtë përvjetor të 10 prillit, një datë që lidhet drejtpërdrejt me ngjarjen.
Deri më tani nuk ka një reagim zyrtar nga autoritetet lidhur me vendosjen e tyre, ndërsa mbetet për t’u parë nëse do të ketë zhvillime të mëtejshme rreth kësaj çështjeje.
