Çahet tubacioni i ujësjellësit në Fier, hapet një zgavër në rrugë pranë shkollës “Pinellopi Pirro”
Fier – Një problem serioz me rrjetin e ujësjellësit është regjistruar mesditën e sotme në rrugën “Jakov Xoxa”, pranë shkollës “Pinellopi Pirro”, ku çarja e një tubacioni ka shkaktuar rrjedhje të shumta uji dhe dëmtime në infrastrukturën rrugore.
Si pasojë e avarisë, një pjesë e segmentit rrugor është dëmtuar, ndërsa uji ka depërtuar në tubacionin e ujërave të ndotura. Sipas të dhënave, nga grryerja e vazhdueshme është krijuar një gropë në zonën e rrethrrotullimit të Sharës, duke sjellë shqetësime për qarkullimin dhe sigurinë e automjeteve.
Banorët shprehen se problematikat me rrjetin e ujësjellësit në këtë zonë janë përsëritur disa herë gjatë muajve të fundit, duke sjellë jo vetëm humbje të ujit të pijshëm, por edhe dëmtime të vazhdueshme në infrastrukturë.
Ndërkohë, strukturat e Ujësjellës Kanalizime Fier kanë ndërhyrë menjëherë në defektin e linjës DN 120, duke bërë të mundur riparimin e plotë të avarisë dhe normalizimin e situatës në zonë.
