DALIN PAMJET E ATENTATIT NË SARANDË/ Momenti kur u ekzekutua Artan Myrtaj, “Tani i Ruzhdiut”
Pamjet e siguruara nga vendi i ngjarjes tregojnë momentet e ekzekutimit dhe sjellin detaje të reja mbi atentatin e rëndë.
Në video, viktima shihet teksa del nga lokali. Një person i veshur me të zeza dhe me skafandër i afrohet dhe tenton ta qëllojë. Sipas pamjeve, arma e parë duket se bllokohet. Autori më pas përdor një pistoletë tjetër, të cilën e mban në dorën e djathtë, duke qëlluar ndaj Myrtajt.
Pas atentatit, autori largohet nga vendngjarja me ndihmën e drejtuesit të një motori me targa greke.
Artan Myrtaj u vra paraditen e së dielës, më 20 shtator, në zonën e njohur si ish-Agjencia, në qytetin e Sarandës. Nga atentati mbeti i plagosur edhe një 73-vjeçar.
Ekzekutimi dyshohet se lidhet me një seri ngjarjesh të mëparshme të regjistruara në Sarandë, që e kanë zanafillën në një plagosje të ndodhur në korrik 2025. Myrtaj raportohet se kishte qenë pjesë e atij konflikti, ndërsa kjo pistë është një nga drejtimet e hetimit.
