Dh*na mes të miturave në Fier, Prokuroria nis hetimet dhe apelon të mos publikohen pamjet e 17-vjeçares
Prokuroria pranë Gjykatës së Shkallës së Parë të Juridiksionit të Përgjithshëm Fier ka reaguar zyrtarisht pas publikimit në rrjetet sociale të videos ku shfaqet dhunimi i një 17-vjeçareje, duke bërë me dije se ngjarja është nën hetim dhe se është regjistruar procedim penal për veprën penale “Heqja e paligjshme e lirisë”, kryer në bashkëpunim.
Sipas njoftimit zyrtar, më 10 qershor 2026 Komisariati i Policisë Fier referoi materialet procedurale në Prokurori lidhur me ngjarjen e ndodhur më 8 qershor, ku një e mitur 17-vjeçare kallëzoi se ishte dërguar në një banesë në qytetin e Fierit dhe më pas ishte dhunuar fizikisht nga disa të mitura.
Në vijim të veprimeve hetimore, Prokuroria kërkoi caktimin e një mase sigurimi personal ndaj njërës prej të miturave në konflikt me ligjin. Me vendim të datës 1 korrik 2026, Gjykata pranoi kërkesën dhe masa e sigurimit vijon të jetë në fuqi.
Organi i akuzës bën me dije se hetimet po vijojnë për zbardhjen e plotë të rrethanave të ngjarjes, përcaktimin e përgjegjësive penale të të gjithë personave të përfshirë, si edhe për të verifikuar mënyrën se si është realizuar, ruajtur dhe më pas shpërndarë videoja në rrjetet sociale.
Prokuroria thekson se, për shkak se në këtë procedim janë të përfshirë të mitur, mbrojtja e privatësisë dhe identitetit të tyre është një detyrim ligjor. Për këtë arsye, ajo u bën thirrje qytetarëve, administratorëve të faqeve në rrjetet sociale dhe mediave të mos publikojnë apo ripublikojnë pamje, video apo të dhëna që mund të çojnë në identifikimin e të miturve, në respekt të legjislacionit shqiptar dhe standardeve ndërkombëtare për mbrojtjen e fëmijëve.
