Dosja e tenderave në Kolonjë: Kryebashkiaku Erion Isai kalon në statusin “i pandehur”
Prokuroria e Posaçme kundër Korrupsionit dhe Krimit të Organizuar ka marrë të pandehur kryebashkiakun e Kolonjës, Erion Isai.
Sipas raportimit të gazetares Klodiana Lala, Erion Isai akuzohet për veprën penale të shkeljes së barazisë në tendera dhe ankande publike, një vepër që lidhet me menaxhimin e burimeve publike në Bashkinë Kolonjë.
Kryebashkiaku është paraqitur në ambientet e Prokurorisë së Posaçme mëngjesin e 15 janarit 2025, por nuk pranoi të japë detaje për gazetarët në lidhje me arsyen e thirrjes së tij. Kur u pyet nga mediat, ai u shpreh shkurt: “Kur të dal, nuk e di”.
Më herët, më 30 maj 2023, Erion Isai është marrë në pyetje nga prokurorët e posaçëm për një periudhë prej tre orësh. Tashmë, me vendimin e fundit të SPAK, ai kalon zyrtarisht në statusin e të pandehurit, çka nënkupton se hetimet kanë avancuar dhe pritet që çështja të shkojë drejt dërgimit në gjykatë.
Çështja mbetet ende në hetim dhe nuk ka një reagim zyrtar nga vetë zoti Isai apo përfaqësues të Bashkisë Kolonjë.
