Ecja është ushtrimi fizik që sjell përfitime të jashtëzakonshme për trupin dhe mendjen

Edhe pse shpesh anashkalohet përballë trendeve më të zhurmshme të fitnesit, ecja mbetet një nga format më efektive, të përballueshme dhe të sigurta të aktivitetit fizik në të gjithë botën.

E aksesueshme për njerëz të çdo moshe dhe niveli të aftësisë fizike, ecja përfaqëson një mjet të fuqishëm për ruajtjen e shëndetit fizik, mendor dhe neurologjik.

Sipas profesor Brian Carson nga Universiteti i Limerick-ut dhe konsultentes së performancës Abigail Ireland, ecja ndikon thellësisht në funksionet trupore dhe mendore, edhe në mungesë të intensitetit që karakterizon format më të avancuara të stërvitjes.

Të dhënat e një studimi australian mbi aktivitetin fizik global tregojnë se ecja është forma më e përhapur e ushtrimit në katër nga gjashtë rajonet e shqyrtuara, përfshirë SHBA-në dhe Azinë Juglindore.

Ecja ‘aktivizon të gjithë trupin’, thekson Carson, duke përmirësuar shpenzimin e energjisë dhe duke nxitur metabolizmin. Ndryshe nga ushtrimet e rënda që mund të lodhin trupin, ecja përshpejton frymëmarrjen dhe qarkullimin pa e mbingarkuar organizmin.

Për më tepër, si një formë aktiviteti me intensitet të ulët, por kohëzgjatje të gjatë, ajo siguron një burim të qëndrueshëm energjie për trupin.

Përveç përfitimeve fizike, efektet neurologjike të ecjes janë po aq të theksuara. Një studim nga Universiteti i Stanfordit zbuloi se ecja rrit kreativitetin me 81%, veçanërisht kur bëhet në natyrë.

Mjedisi i jashtëm stimulon trurin, duke rritur funksionet njohëse dhe përmirësuar përqendrimin.

Carson shton se lëvizja koordinon sistemin nervor dhe ndihmon në përpunimin e informacionit ndijor, duke rritur mirëqenien motorike dhe mendore.

Ecja ndihmon gjithashtu në reduktimin e stilit të jetesës sedentare. Ekipi i Carson në Universitetin e Limerick-ut ka treguar se shpejtësia e ecjes është një faktor i rëndësishëm, ecja e shpejtë lidhet me përmirësim të ndjeshëm të shëndetit kardiovaskular dhe jetëgjatësisë.

Në fushën e fitnesit, shpesh besohet se ushtrimet aerobike pengojnë zhvillimin e muskujve. Por Carson thekson se kjo lidhje është më komplekse.

Një eksperiment tregoi se ulja drastike e numrit të hapave ditorë çon në humbje të ndjeshme të masës muskulore dhe reduktim të sintezës së proteinave me 28%, edhe kur ushqehemi me proteina të mjaftueshme.

Ecja në kombinim me ushtrime rezistence ndihmon në ruajtjen e muskujve, ndërsa praktika si ‘rucking’ (ecja me peshë) forcojnë muskujt e këmbëve dhe barkut.

Ndër përfitimet më të kërkuara, ecja ndihmon në djegien e dhjamit, duke qenë një formë e aktivitetit të njohur si LISS (intensitet i ulët, kohëzgjatje konstante), e përsosur për ata që synojnë të humbin peshë pa stres fizik të tepërt.

Por ndoshta më i rëndësishmi është roli i saj në mirëqenien mendore. Ecja ul stresin, përmirëson humorin dhe ndihmon në qartësinë mendore.

Siç shpjegon Carson, ‘ecja duhet të shihet si themeli i aktivitetit fizik’, një zakon i thjeshtë, por i fuqishëm që kontribuon në shëndet afatgjatë.

Pavarësisht se nuk ofron rezultate të menjëhershme apo spektakolare, ecja mbetet një bazë e qëndrueshme për mirëqenien fizike dhe mendore.

Me ndikimin e saj pozitiv në metabolizëm, tru dhe shëndet psikologjik, është një aktivitet i përkryer për çdo stil jetese, një hap i thjeshtë drejt një jete më të shëndetshme.