Ekzekutohet vendimi i Apelit të GJKKO, ish-zyrtari i Kadastrës në Fier rikthehet në burg për korrupsion
Drejtoria Vendore e Policisë Fier ka njoftuar sot ekzekutimin e një vendimi të formës së prerë ndaj shtetasit Endri Ngresi, 38 vjeç, banues në Fier.
Sipas policisë, specialistët e Seksionit për Hetimin e Krimeve Ekonomike kanë zbatuar vendimin nr. 11, datë 02.04.2026, të Gjykatës së Posaçme të Apelit për Korrupsionin dhe Krimin e Organizuar, e cila ka lënë në fuqi vendimin e mëparshëm të shkallës së parë. Si rezultat, Ngresi do të vuajë edhe 1 vit, 8 muaj e 10 ditë burgim për veprën penale “Korrupsioni pasiv i personave që ushtrojnë funksione publike”.
Ngresi, ish-punonjës i Kadastrës (ASHK) në Fier, ishte dënuar më herët nga Gjykata e Posaçme me 3 vite burgim, si dhe me heqjen e së drejtës për të ushtruar funksione publike për një periudhë 5-vjeçare.
Sipas hetimeve të Prokurorisë së Posaçme (SPAK), ai rezultoi i përfshirë në një rast korrupsioni, ku kishte përfituar 2 mijë euro ryshfet nga dy qytetarë, Ardjan Kumaraku dhe Afërdita Vidhi, në këmbim të legalizimit të një banese dhe pajisjes me dokumentacionin përkatës.
Në të njëjtën çështje, Gjykata dënoi Ardjan Kumarakun me 1 vit burgim, ndërsa për Afërdita Vidhin u vendos përjashtimi nga dënimi, megjithëse u shpall fajtore.
Vendimi i Apelit vulos përfundimisht çështjen, duke lënë në fuqi dënimin ndaj ish-zyrtarit të Kadastrës në Fier.
