FIER/ 32 vite në shërbim të Policisë së Shtetit, vlerësohet me Certifikatën e Karrierës nënkomisari Besnik Mahmutaj
FIER – Pas më shumë se tri dekadash në radhët e Policisë së Shtetit, nënkomisari Besnik Mahmutaj, oficer pranë Drejtorisë Vendore të Policisë Fier, është vlerësuar me Certifikatën e Karrierës, në shenjë mirënjohjeje për 32 vite shërbim, profesionalizëm dhe përkushtim në përmbushjen e detyrave.
Vlerësimi është akorduar nga Drejtori i Përgjithshëm i Policisë së Shtetit, Drejtues Madhor Skënder Hita, ndërsa ceremonia u zhvillua në ambientet e Drejtorisë Vendore të Policisë Fier.
Në emër të Drejtorit të Përgjithshëm, certifikatën ia dorëzoi zëvendësdrejtori për Hetimin e Krimit, kryekomisar Alket Ahmetaj.
Në motivacionin e vlerësimit theksohet kontributi i dhënë gjatë viteve të shërbimit, profesionalizmi dhe përkushtimi i treguar nga nënkomisar Mahmutaj në përmbushjen e detyrave të ngarkuara.
Gjatë 32 viteve të karrierës, ai është dalluar për korrektësi, integritet dhe përgjegjshmëri në ushtrimin e funksioneve të tij, duke u vlerësuar edhe si një shembull për kolegët dhe brezat e rinj të punonjësve të Policisë së Shtetit.
Në përfundim të ceremonisë, nënkomisar Besnik Mahmutaj shprehu mirënjohjen për vlerësimin e marrë, ndërsa uroi kolegët për suksese të mëtejshme në përmbushjen e misionit dhe detyrave të Policisë së Shtetit.
