ÇFARË LA PAS ZJARRI I PËRMASAVE TË MËDHA NË LEVAN – DHJETËRA MILIONË LEKË DËME, FAMILJET PËRBALLEN ME PASOJAT
Fier – Kjo është gjithçka që ka mbetur pas zjarrit të përmasave të mëdha që përfshiu ditën e djeshme zonën e Levanit në Fier. Pas një nate të gjatë përballjeje me flakët, sot pasojat janë të dukshme kudo: ullishte të djegura, sipërfaqe pyjore të shkrumbuara, biznese të dëmtuara dhe familje që kanë humbur pasurinë e tyre.
Flakët nisën në fshatin Vadhizë dhe, të favorizuara nga era e fortë dhe temperaturat e larta, u përhapën me shpejtësi, duke përfshirë qindra hektarë me ullishte, pyje dhe shkurre në territorin e Vadhizës, Peshtanit dhe Levanit.
Sot, banorët përballen me pasojat e një dite që për shumë prej tyre u kthye në momente të vërteta tmerri, ndërsa dëmet materiale janë të konsiderueshme.
Një prej familjeve më të prekura është ajo e Fevzi Bibos. Zjarri ka shkrumbuar stallën e bagëtive, sasi të mëdha ushqimi për kafshët, si dhe makineri bujqësore. Sipas familjarëve, dëmet paraprake llogariten në mbi 30 milionë lekë.
Por për familjen Bibo, përtej dëmit të madh ekonomik, sot emergjenca kryesore është sigurimi i ushqimit për bagëtitë që kanë mundur të shpëtojnë nga flakët.
Dëme të konsiderueshme janë regjistruar edhe në Levan, ku një banori i është djegur biznesi, i cili ishte burimi i vetëm i të ardhurave për familjen e tij. Edhe në këtë rast, dëmet paraprake vlerësohen në mbi 30 milionë lekë.
Banori kërkon që dëmet të evidentohen dhe të vlerësohen nga institucionet përgjegjëse. Ai shprehet se kjo nuk është hera e parë që zjarri i shkatërron pronën dhe ullishtet, ndërsa për dëmet e mëparshme, sipas tij, nuk ka marrë asnjë vlerësim apo kompensim.
Ndërkohë, beteja me flakët nuk ka përfunduar ende.
Zjarri i nisur ditën e djeshme vijon të jetë aktiv në disa zona, ndërsa aktualisht flakët vazhdojnë të djegin sipërfaqe me pyje dhe ullishte në kodrat e fshatit Frakull.
Në terren ndodhen forca të shumta zjarrfikëse, të cilat po punojnë për izolimin e vatrave aktive. Operacioni po mbështetet edhe nga ajri, me ndërhyrjen e një avioni zjarrfikës.
Pas një nate dhe një dite të gjatë përballjeje me flakët, banorët e zonës tashmë përballen me një tjetër betejë: pasojat e zjarrit.
Ata presin ndërhyrjen e institucioneve për evidentimin dhe vlerësimin e dëmeve, ndërsa familjet që kanë humbur stallat, bizneset, makineritë bujqësore dhe prodhimet e tyre kërkojnë ndihmë për të nisur nga e para.
