Fier/ Plagosen dy persona pas një konflikti, shpallet në kërkim një 36-vjeçar
Dy shtetas kanë mbetur të plagosur pas një konflikti të ndodhur mbrëmjen e 10 majit në Fier.
Sipas njoftimit të Policisë, rreth orës 23:00, në spital janë paraqitur për ndihmë mjekësore shtetasi R. H., 28 vjeç, i dëmtuar në kokë me sende të forta, si dhe shtetasi D. H., 28 vjeç, i dëmtuar me mjet prerës.
Nga veprimet paraprake të grupit hetimor ka rezultuar se ngjarja ka ndodhur si pasojë e një konflikti të çastit.
Specialistët për Hetimin e Krimeve në Komisariatin e Policisë Fier kanë identifikuar si një prej autorëve të dyshuar shtetasin S. R., 36 vjeç, banues në fshatin Vadhizë, Fier, person me precedent penal, i cili është shpallur në kërkim.
Në bashkëpunim me Prokurorinë, vijojnë hetimet për zbardhjen e plotë të rrethanave të ngjarjes, si dhe për identifikimin dhe kapjen e personave të tjerë të përfshirë në konflikt.
