FSHF organizon event mirënjohjeje për Silvinjon dhe stafin e tij: “Forever” për kontributin te Kombëtarja
Federata Shqiptare e Futbollit organizoi një event mirënjohjeje dhe falënderimi për ish-trajnerin e Kombëtares shqiptare, Sylvinho, si edhe për dy zëvendëstrajnerët e tij, Dorival dhe Pablo Zabaleta, për kontributin dhe punën e tyre gjatë tre viteve e gjysmë në krye të kuqezinjve.
Në këtë aktivitet morën pjesë presidenti i FSHF-së, Armand Duka, anëtarë të Komitetit Ekzekutiv, administrata e Federatës, përfaqësues të medias, ish-futbollistë të Kombëtares, sponsorë dhe bashkëpunëtorë.
Në një atmosferë vlerësimi dhe respekti, Duka falënderoi stafin teknik për profesionalizmin, përkushtimin dhe mënyrën dinjitoze me të cilën përfaqësuan fanellën kuqezi, duke veçuar si moment kulmor kualifikimin historik dhe pjesëmarrjen e Shqipërisë në UEFA Euro 2024.
Si shenjë mirënjohjeje, presidenti i FSHF-së u dhuroi trajnerëve fanella të Kombëtares me mbishkrimin “Forever”, si simbol i kontributit të tyre në historinë e futbollit shqiptar.
Nga ana e tij, Silvinjo u shpreh i emocionuar dhe krenar për periudhën në krye të Kombëtares, duke theksuar se mbi gjithçka do të mbajë mend marrëdhëniet njerëzore dhe frymën e bashkëpunimit.
“Jam absolutisht i lumtur për atë që kemi bërë. Përtej rezultateve sportive, ajo që do të mbetet gjithmonë në zemrën time janë njerëzit, raportet humane dhe çdo moment i ndarë me stafin e Federatës”, u shpreh ai.
