GJYKATA E FIERIT LË NË BURG ARBEN VOJËN, DILAVER SHYTIN DHE ANILA HAXHIUN, NDRYSHON MASËN PËR NJË NGA TË DYSHUARIT
Pas rreth 8 orësh seancë maratonë në Gjykatën e Fierit, është vendosur vijimi i masës së sigurisë “Arrest në burg” për ish-drejtorin e Kadastrës së Fierit, Arben Vojën, Dilaver Shytin dhe noteren Anila Haxhiu.
Ndërkohë, për Fjorelo Biden gjykata ka ndryshuar masën e sigurisë, duke vendosur ndaj tij tre masa ndaluese. Për Arbina Jaupajn janë lënë në fuqi masat e mëparshme, “Ndalim i daljes jashtë shtetit” dhe “Detyrim për t’u paraqitur në policinë gjyqësore”.
Çështja lidhet me tjetërsimin e rreth 44 mijë metrave katrorë tokë shtetërore në zonën e Povelçës, e cila dyshohet se është kaluar në pronësi private për ndërtimin e një parku fotovoltaik, përmes dokumenteve të falsifikuara.
Të dyshuarit përballen me akuzat për mashtrim, falsifikim dokumentesh, shpërdorim detyre dhe pastrim të produkteve të veprës penale.
Vendimet janë marrë nga gjyqtari Noel Veizi, ndërsa çështja po ndiqet nga prokurori Leonard Suçi.
Hetimet për tjetërsimin e pronës shtetërore vijojnë.
