Gjykata e Fierit lë në burg dajën e deputetes, akuzohet për plagosjen e 67-vjeçarit në Roskovec
Gjykata e Shkallës së Parë e Juridiksionit të Përgjithshëm Fier ka vendosur vijimin e masës së sigurisë “Arrest në burg” për Bledar Bakajn, dajën e deputetes socialiste Zegjine Çaushi, i dyshuar për plagosjen e rëndë me dashje të 67-vjeçarit Enver Gremaj në fshatin Suk të Roskovecit.
Vendimi është marrë këtë të hënë, më 9 nëntor 2026, nga gjyqtarja Bora Shaholli, pas shqyrtimit të kërkesës së Prokurorisë pranë Gjykatës së Fierit, të përfaqësuar nga prokurorja Oliana Gjergjefi.
Sipas komunikatës zyrtare të gjykatës, B.B., i mbrojtur nga avokatët Shkëlqim Beqiraj dhe Klaudio Dhima, është nën hetim për veprat penale “Plagosja e rëndë me dashje”, parashikuar nga neni 88/2 i Kodit Penal, si dhe “Veprime në kundërshtim me vendimin e gjykatës”, parashikuar nga neni 321/2 i Kodit Penal.
Gjykata ka vendosur caktimin e masës së sigurimit personal shtrënguese “Arrest në burg”, me afat deri më 17 dhjetor 2026. Për ekzekutimin e këtij vendimi është urdhëruar Policia Gjyqësore.
NGJARJA NË FSHATIN SUK
Çështja lidhet me ngjarjen e ndodhur më 14 shtator 2026 në fshatin Suk të Roskovecit, ku 67-vjeçari Enver Gremaj mbeti i plagosur me drapër pas një konflikti.
Sipas të dhënave të bëra publike në atë kohë, autori i dyshuar ishte Bledar Bakaj, 52 vjeç, i cili dyshohej se kishte shkelur edhe një vendim gjykate që lidhej me një urdhër mbrojtjeje në favor të ish-bashkëjetueses së tij, vajzës së të plagosurit.
Pas ngjarjes, 67-vjeçari u transportua për ndihmë mjekësore, ndërsa 52-vjeçari u vu në pranga nga policia.
DAJA I DEPUTETES ZEGJINE ÇAUSHI
Bledar Bakaj është daja i deputetes socialiste të qarkut Fier, Zegjine Çaushi. Pas ngjarjes së shtatorit, deputetja reagoi publikisht, duke u distancuar nga çdo formë dhune dhe duke theksuar se çështja duhet të trajtohet nga organet e drejtësisë.
Ndërkohë, vendimi i sotëm i Gjykatës së Fierit mund të ankimohet në Gjykatën e Apelit të Juridiksionit të Përgjithshëm Tiranë brenda pesë ditëve nga njoftimi.
