Gjykata Kushtetuese shfuqizon vendimin e Gjykatës së Lartë për masën e sigurisë ndaj Erion Veliajt
Gjykata Kushtetuese ka vendosur të shfuqizojë vendimin e Gjykatës së Lartë lidhur me masën e sigurisë ndaj kryebashkiakut të Tiranës, Erion Veliaj, duke e kthyer çështjen për rishqyrtim.
Sipas arsyetimit të Gjykatës Kushtetuese, Gjykata e Lartë nuk ka ushtruar një kontroll kushtetues efektiv mbi masën e sigurisë dhe nuk ka analizuar në mënyrë të plotë proporcionalitetin e saj në raport me funksionin publik të ushtruar nga Veliaj.
Në vendim theksohet se nuk janë vlerësuar në mënyrë konkrete alternativat ndaj paraburgimit, si dhe mungon një analizë kushtetuese mbi ndikimin që masa e sigurisë ka në ushtrimin e mandatit të fituar përmes zgjedhjeve vendore dhe në të drejtën e qytetarëve për t’u përfaqësuar nga i zgjedhuri i tyre.
Për pasojë, Gjykata e Lartë do të duhet ta shqyrtojë sërish çështjen, duke respektuar standardet kushtetuese të përcaktuara nga Gjykata Kushtetuese.
Ky është vendimi i dytë i Gjykatës Kushtetuese që lidhet me kërkesat e Veliajt, pas një vendimi të mëparshëm që trajtonte standardet kushtetuese për ushtrimin e mandatit të tij si kryetar i Bashkisë së Tiranës.
Veliaj ndodhet në paraburgim që prej 10 shkurtit 2025. Ai është nën hetim nga Struktura e Posaçme Kundër Korrupsionit dhe Krimit të Organizuar për disa vepra penale, përfshirë korrupsionin pasiv, pastrimin e parave, mosdeklarimin e pasurisë, shpërdorimin e detyrës dhe futjen e sendeve të ndaluara në burg. Hetimet ndaj tij vijojnë, ndërsa vendimi i Gjykatës Kushtetuese nuk përbën një vendim mbi fajësinë ose pafajësinë e tij, por lidhet me mënyrën se si është shqyrtuar masa e sigurisë.
