Himarë/ Lamallari dhe Hita inspektojnë masat e sigurisë, prezantohet kontrolli kufitar detar direkt në det
Ministri i Punëve të Brendshme, Besfort Lamallari, dhe Drejtori i Përgjithshëm i Policisë së Shtetit, Drejtues Madhor Skender Hita, zhvilluan një inspektim në Himarë për të parë nga afër masat e marra për garantimin e sigurisë gjatë sezonit turistik.
Gjatë takimit, ku ishte i pranishëm edhe kryetari i Bashkisë Himarë, Vangjel Tavo, u diskutua mbi bashkëpunimin mes Policisë së Shtetit dhe pushtetit vendor për garantimin e rendit dhe sigurisë publike, sigurisë rrugore e detare, reagimin e shpejtë ndaj situatave emergjente, si dhe përmirësimin e shërbimeve për turistët vendas dhe të huaj.
Një nga risitë më të rëndësishme të këtij sezoni turistik u prezantua nga Drejtori i Përgjithshëm i Policisë së Shtetit, Skender Hita. Sipas tij, për herë të parë kontrolli kufitar për mjetet lundruese do të kryhet direkt në det.
“Jahtet dhe anijet lundruese nuk do të kenë më nevojë të paraqiten në pikat e kalimit kufitar. Policia Kufitare do të shkojë pranë tyre dhe do të kryejë verifikimet në sistemin TIMS, duke regjistruar të dhënat e të gjithë pushuesve që frekuentojnë bregdetin shqiptar”, deklaroi Hita.
Ai theksoi se kjo risi synon të rrisë cilësinë e shërbimeve policore, të lehtësojë procedurat për mjetet lundruese dhe të forcojë rendin, sigurinë publike dhe sigurinë detare përgjatë sezonit turistik.
