I dënuar për “vrasje me dashje”, ndërron jetë nga arresti kardiak 73-vjeçari nga Fieri; ishte transferuar nga burgu i Lezhës në QSUT për trajtim të specializuar
Një i burgosur 73-vjeçar ka ndërruar jetë ditën e sotme në Qendrën Spitalore Universitare “Nënë Tereza” në Tiranë, ku po merrte trajtim të specializuar pas përkeqësimit të gjendjes shëndetësore.
Sipas njoftimit të Drejtorisë së Përgjithshme të Burgjeve, bëhet fjalë për shtetasin me inicialet A.B., i lindur më 1 korrik 1953 dhe banues në Fier, i dënuar për veprën penale “Vrasje me dashje”.
73-vjeçari ishte transferuar në IEVP Lezhë më 27 nëntor 2021 me masë mjekimi të detyruar. Pas rëndimit të gjendjes shëndetësore, ai fillimisht u dërgua në Spitalin Rajonal të Lezhës dhe më pas u transferua në QSUT për trajtim të specializuar.
Pacienti ishte i shtruar në urgjencën e QSUT-së që prej datës 17 maj 2026, ndërsa ka ndërruar jetë sot, rreth orës 12:20.
Sipas informacionit paraprak mjekësor, shkaku i vdekjes rezulton të jetë arrest kardiak, ndërsa rasti po ndiqet sipas procedurave përkatëse.
