I moshuari shpëtohet nga mbytja në plazhin e Semanit, ndërhyrja e rojeve bregdetare i shpëton jetën
Një 70-vjeçar nga Lushnja, i cili po pushonte së bashku me familjen në plazhin e Semanit, është shpëtuar nga mbytja falë ndërhyrjes në kohë të dy vëzhguesve të plazhit.
Sipas të dhënave paraprake, dy vëzhguesit e pranishëm pranë plazhit publik kanë konstatuar se pushuesi dilte dhe zhytej në ujë në mënyrë të përsëritur dhe kanë ndërhyrë menjëherë për ta nxjerrë nga deti.
Pas nxjerrjes në breg, vëzhguesit kanë ndjekur hap pas hapi protokollin e ndihmës së parë, duke bërë të mundur stabilizimin e frymëmarrjes së 70-vjeçarit.
Rreth 25 minuta më vonë, një autoambulancë ka mbërritur në vendngjarje dhe e ka transportuar pushuesin drejt Spitalit Rajonal të Fierit, ku ka marrë ndihmën e nevojshme mjekësore.
Pas trajtimit, gjendja e tij është stabilizuar dhe rreziku për jetën ka kaluar.
Ndërhyrja e shpejtë e vëzhguesve të plazhit rezultoi vendimtare në shpëtimin e jetës së pushuesit.
