Kanosje me armë zjarri në Durrës, arrestohet 45-vjeçari nga Xhafzotaj
Një ngjarje e rëndë është regjistruar në Durrës, ku një 45-vjeçar ka rënë në prangat e Policisë pasi dyshohet se ka kanosur me armë zjarri një 38-vjeçar, për motive të dobëta.
Sipas burimeve zyrtare, shtetasi me inicialet E. K., banues në Xhafzotaj, më datë 16 shkurt 2026, në vendin e quajtur “Kodra e Rrashbullit”, është konfliktuar në rrugë me shtetasin E. D., 38 vjeç. Pas përplasjes verbale, ai dyshohet se e ka kanosur këtë të fundit me një armë zjarri, të dyshuar automatik.
Specialistët e Seksionit për Hetimin e Krimeve të Rënda në DVP Durrës, pas kallëzimit të bërë nga 38-vjeçari, organizuan veprimet hetimore dhe bënë të mundur arrestimin në flagrancë të 45-vjeçarit.
Gjatë kontrollit në automjetin e tij, shërbimet e Policisë gjetën dhe sekuestruan bërthamën e predhës së një fisheku luftarak, si dhe automjetin në cilësinë e provës materiale.
Ndërkohë, vijojnë hetimet për gjetjen e armës së zjarrit, e cila dyshohet se është fshehur nga autori pas ngjarjes, si dhe për zbardhjen e plotë të rrethanave.
Materialet procedurale i janë referuar Prokurorisë së Durrësit për veprime të mëtejshme.
