Keqpërdorim i fondeve për Covid-19/ Arrestohen 22 persona,sekuestrohen makina dhe vila luksoze me vlerë 600 milionë euro
Policia europiane ka arrestuar 22 persona dhe ka sekuestruar pasuri me vlerë më shumë se 600 milionë euro në lidhje me mashtrimin e dyshuar të lidhur me fondin e rimëkëmbjes pas pandemisë së Bashkimit Europian.
Pas një hetimi nga prokurori i BE-së, tetë persona u ndaluan, 14 u vendosën në arrest shtëpiak dhe dy të tjerëve iu ndalua ushtrimi i profesionit.
Arrestimet u kryen në Itali, Austri, Rumani dhe Sllovaki.
Policia financiare italiane tha të enjten se kishte sekuestruar Lamborghini, Porshe, Rolex, bizhuteri Cartier, kriptovaluta, vila luksoze dhe sende të tjera gjatë dhjetëra bastisjeve në shtëpi dhe zyra.
Ky rast ngre shqetësimet rreth keqpërdorimit të fondit të rimëkëmbjes prej 800 miliardë eurosh të BE-së për të ndihmuar në ringjalljen e ekonomisë.Italia ishte përfituesi më i madh i fondit, me grante prej më shumë se 194 miliardë euro.
Zyra e Prokurorit Publik Europian (EPPO) tha se një organizatë kriminale dyshohet se ka drejtuar një skemë mashtrimi midis 2021 dhe 2023 për të mashtruar paketat e rimëkëmbjes së Italisë.
Në vitin 2021, grupi aplikoi për të marrë grante, gjoja për të mbështetur kompanitë e vogla dhe të mesme, por më vonë përgatiti bilanc të rremë “për të treguar se kompanitë ishin aktive dhe fitimprurëse, ndërsa në fakt ato ishin kompani joaktive, fiktive.”
Pasi mori rreth 600 milionë euro në fonde nga Plani Kombëtar Italian i Rimëkëmbjes dhe Rezistencës (NRRP), grupi më pas i transferoi fondet në llogaritë e tyre bankare në Austri, Rumani dhe Sllovaki.
Zyra e prokurorit pretendoi se grupi përdorte kriptomonedha, inteligjencë artificiale dhe serverë cloud për të kryer dhe fshehur mashtrimin. Shtetet e Bashkuara janë përpjekur gjithashtu të godasin mashtrimin e supozuar që përfshin burimet e ndihmës për Covid-19.
