Konflikti i biznesmenëve në Vlorë/ Policia sekuestron mjetin ‘Range Rover’ me shenja plumbash
Një automjet tip “Range Rover” është sekuestruar nga Policia pas një ndjekjeje në zonën e Vlorës. Mjeti, i cili rezulton me shenja të dyshuara plumbash, u ndalua pas konfliktit të sotëm mes biznesmenave.
Ngjarja ka nisur rreth orës 12:00, në pikën e kontrollit në Rrethin e Alikokës, ku “Range Rover”-i nuk ka ndaluar dhe ka vijuar në drejtim të fshatit Peshkëpi. Gjatë ndjekjes, në vendin e quajtur Ura e Peshkëpisë, automjeti ka dalë nga rruga dhe ka goditur barrierat mbrojtëse.
Në automjet ndodheshin Luan Muça, drejtuesi i mjetit, si dhe dy vëllezërit Klaudio dhe Mandrit Lleshaj, punonjës të SH.P.S.F. “Swat Security”. Si pasojë e aksidentit, Luan Muça dhe Mandrit Lleshaj janë dëmtuar dhe janë transportuar në Spitalin Rajonal të Vlorës, jashtë rrezikut për jetën.
Gjatë kontrollit të “Range Rover”-it, Policia ka gjetur dhe sekuestruar një pistoletë dhe një krehër me 16 fishekë luftarakë.
Ndërkohë, rreth orës 13:00, një tjetër pikë kontrolli e ngritur nga shërbimet e DVP Fier, në Mbikalimin e Memorialit, ka ndaluar një automjet të shpallur në kërkim, me drejtues shtetasin kosovar Blerim Heta.
Nga këqyrja e këtij automjeti janë konstatuar dëmtime në xhamin e krahut të pasagjerit, të dyshuara se janë shkaktuar nga të shtënat me armë zjarri. Brenda mjetit janë gjetur edhe tre fishekë pistolete.
Rreth orës 16:30, në bypass-in e Vlorës, pranë fshatit Kaninë, është gjetur duke u djegur një automjet tip “Audi A8”, i dyshuar se është përdorur nga autorët e ngjarjes.
Sipas hetimeve të Policisë, Luan Muça, së bashku me persona të tjerë, dyshohet se ka shkuar në hotelin në pronësi të Vasil Bedinajt, të cilit, nën kërcënimin e armëve dhe dhunës fizike, i kanë kërkuar 5 milionë euro dhe e kanë kërcënuar se, pas 48 orësh, duhet të largohej nga Shqipëria.
Në vijim të ngjarjes, Angjelo Breshani dyshohet se ka marrë armën e zjarrit që Vasil Bedinaj e posedonte me leje dhe ka qëlluar në drejtim të automjeteve të personave që ndodheshin në zonë.
Në përfundim të operacionit janë arrestuar në flagrancë pesë persona: Luan Muça, 55 vjeç; Klaudio Lleshaj, 29 vjeç; Mandrit Lleshaj, 33 vjeç; Blerim Heta, 40 vjeç, shtetas kosovar; dhe Angjelo Breshani, 29 vjeç.
Policia ka shpallur gjithashtu në kërkim gjashtë persona dhe katër automjete të dyshuara se janë përfshirë në ngjarje.
