Kontrolle në burgjet e vendit, sekuestrohen celularë dhe mjete prerëse në Fier, Korçë dhe Rrogozhinë
Drejtoria e Përgjithshme e Burgjeve ka vijuar kontrollet e befasishme në institucionet e ekzekutimit të vendimeve penale në vend, në kuadër të masave për forcimin e sigurisë dhe parandalimin e futjes së sendeve të ndaluara në ambientet e burgjeve.
Sipas njoftimit zyrtar, kontrollet janë zhvilluar në IEVP Korçë, Fier dhe Rrogozhinë, ku janë konstatuar dhe sekuestruar disa sende të ndaluara.
Në IEVP Korçë u gjet dhe u sekuestrua një aparat celular i llojit iPhone 15. Ndërkohë, në IEVP Fier u konstatua dhe u sekuestrua një aparat celular së bashku me karikuesin e tij.
Gjatë kontrollit në IEVP Rrogozhinë, shërbimet zbuluan dhe sekuestruan dy aparate celularë, të markave Samsung dhe iPhone, si dhe disa mjete prerëse të përgatitura në mënyrë artizanale.
Për të gjitha rastet janë kryer veprimet procedurale përkatëse dhe është njoftuar Agjencia e Mbikëqyrjes në Sistemin e Ekzekutimit të Vendimeve Penale për ndjekjen e mëtejshme të rasteve.
Drejtoria e Përgjithshme e Burgjeve thekson se kontrollet do të vijojnë në të gjitha institucionet penitenciare të vendit, me synimin për garantimin e rendit, sigurisë dhe parandalimin e çdo veprimtarie të kundërligjshme brenda tyre.
