Mallakastër/Kanos dhe goditi me armë sportive 52-vjeçarin në banesë, arrestohet 49-vjeçari
Sekuestrohet pistoleta sportive që posedonte pa leje
Një 49-vjeçar është arrestuar nga Policia e Mallakastrës, pasi dyshohet se ka hyrë në banesën e një 52-vjeçari në Ballsh, e ka kanosur me armë sportive dhe e ka goditur me qytën e saj.
Specialistët për Hetimin e Krimeve të Komisariatit të Policisë Mallakastër kanë organizuar punën pas kallëzimit të 52-vjeçarit, i cili deklaroi se një shtetas i kishte hyrë në banesë, e kishte kanosur dhe më pas e kishte goditur me një send të fortë.
Brenda një kohe të shkurtër, policia ka bërë të mundur kapjen dhe arrestimin e Aleksandër Toskës, 49 vjeç, banues në fshatin Panahor, Mallakastër.
Nga veprimet e para hetimore dyshohet se 49-vjeçari, për motive të dobëta, ka hyrë në banesën e 52-vjeçarit në Ballsh, e ka kanosur me një armë sportive (pistoletë) dhe e ka goditur me qytën e saj.
Arma sportive është sekuestruar nga policia në cilësinë e provës materiale.
Materialet procedurale i janë referuar Prokurorisë së Fierit, për veprat penale “Dhunimi i banesës”, “Prodhimi dhe mbajtja pa leje e armëve të gjuetisë dhe sportive”, “Dëmtime të tjera me dashje” dhe “Kanosja”.
