Marrëveshje bashkëpunimi mes Policisë së Shtetit dhe Rezidencës Studentore Universitare Nr. 1 Sh. A.
Tiranë, 3 shtator 2025 – Policia e Shtetit ka nënshkruar një marrëveshje bashkëpunimi me Rezidencën Studentore Universitare Nr. 1 Sh. A., me qëllim sigurimin e kushteve më cilësore të akomodimit për studentët e Akademisë së Sigurisë.
Marrëveshja u firmos në Drejtorinë e Përgjithshme të Policisë së Shtetit nga Drejtori i Përgjithshëm, Drejtues Madhor Ilir Proda, dhe Drejtori i Përgjithshëm i Rezidencës, z. Olsi Shahini. Ky akt parashikon pagesën nga Akademia e Sigurisë të tarifës mujore të akomodimit për studentët që do të strehohen në këtë rezidencë.
Drejtori Proda u shpreh se ky bashkëpunim është një ndihmë e madhe për studentët e Akademisë së Sigurisë dhe një formë inkurajimi në rrugëtimin e tyre drejt profesionit të punonjësit të policisë.
Nga ana e tij, z. Shahini falënderoi Policinë e Shtetit për bashkëpunimin dhe theksoi se Rezidenca Studentore Universitare Nr. 1 do të ofrojë ambiente të përshtatshme dhe konform standardeve europiane për nevojat e studentëve.
