Mësuesi i arrestuar për ngacmim ndaj nxënëses mbërrin në gjykatë për masën e sigurisë
Mësuesi 60-vjeçar, Madrid Sula, nga fshati Thanasaj i Lushnjës, ka mbërritur në Gjykatë për t’u njohur me masën e sigurisë, pas arrestimit të tij lidhur me denoncimin e prindërve të një nxënëseje 13-vjeçare.
Sipas të dhënave paraprake, prindërit e të miturës kanë denoncuar mësuesin pasi vajza u kishte treguar atyre për mesazhe me përmbajtje erotike që dyshohet se i kishte marrë prej tij. Prindërit më pas i kanë vënë në dispozicion të policisë mesazhet, duke çuar në nisjen e procedurave dhe arrestimin e 60-vjeçarit.
Sot, mësuesi pritet të përballet me gjykatën për vlerësimin e ligjshmërisë së arrestimit dhe caktimin e masës së sigurimit.
Seanca do të drejtohet nga gjyqtari Noel Veizi, ndërsa prokurori i çështjes, Skerdi Sinanaj, mësohet se ka paraqitur prova dhe pritet të kërkojë masën e sigurimit “arrest në burg” për mësuesin.
Hetimet për rastin vijojnë, ndërsa vendimi për masën e sigurisë do të merret nga gjykata pas shqyrtimit të provave dhe pretendimeve të palëve.
