Nga zgjedhje në referendum? Demokratët e Qarkut Fier, votojnë nesër për kreun e partisë
Procesi për zgjedhjen e kreut të Partisë Demokratike duket se ka marrë një rrjedhë disi të pazakontë, duke i ngjarë më shumë një referendumi sesa një gare të mirëfilltë mes kandidatësh.
Me vetëm Sali Berishën në garë dhe pa një emër tjetër përballë, demokratëve kësaj here duket se u mbetet më shumë të japin një miratim sesa të zgjedhin mes alternativave. Në politikë zakonisht flitet për garë dhe konkurrencë, por këtë herë duket se gara ka vendosur të zhvillohet me “një korsi”.
Më 23 maj, demokratët e Fierit, Mallakastrës, Lushnjës, Divjakës, Roskovecit dhe Patosit do t’u drejtohen kutive të votimit në kuadër të procesit për zgjedhjen e kreut të partisë.
Procesi i votimit do të nisë në orën 08:00 dhe do të përfundojë në orën 18:00. Mbetet për t’u parë nëse surpriza do të vijë nga pjesëmarrja, pasi kandidati duket se dihet prej kohësh.
