Plagosje me armë zjarri në Tiranë, 34-vjeçari Juxhin Hamajezi përfundon në spital
Një plagosje me armë zjarri është regjistruar pak para mesnatës në Tiranë, në rrugën “Aleksandër Moisiu”, ku një 34-vjeçar ka mbetur i plagosur në këmbë.
Sipas informacioneve paraprake, rreth orës 23:55 është paraqitur për ndihmë mjekësore në spital Juxhin Hamajezi, i cili dyshohet se ishte plagosur me armë zjarri. Burimet bëjnë me dije se ai ndodhet jashtë rrezikut për jetën.
Nga veprimet e para hetimore dyshohet se ngjarja ka ndodhur pas një konflikti të çastit për motive të dobëta në rrugën “Aleksandër Moisiu”.
Ndërkohë, emri i Hamajezit rezulton i njohur për autoritetet edhe nga ngjarje të mëparshme. Në vitin 2018 ai i kishte shpëtuar një atentati në zonën e Kinostudios, ndërsa në vitin 2021 ishte arrestuar nga Komisariati nr. 4, pasi ishte shpallur në kërkim nga Policia e Pogradecit për trafikim klandestinësh.
Grupi hetimor, nën drejtimin e Prokurorisë, po vijon punën për zbardhjen e plotë të rrethanave të ngjarjes, identifikimin dhe kapjen e autorit ose autorëve.
