Policia e Shtetit apelon: Kujdes maksimal nga përkeqësimi i motit, shmangni daljet në det dhe udhëtimet e rrezikshme
Policia e Shtetit ka dalë me një apel për qytetarët dhe drejtuesit e mjeteve lundruese, pas parashikimeve për përkeqësimin e kushteve hidrometeorologjike detare dhe atmosferike.
Sipas njoftimit, duke filluar nga mesdita e datës 24 korrik 2026 deri në paraditen e 25 korrikut 2026, mjetet e vogla lundruese dhe mjetet e peshkimit që operojnë jashtë Gjirit të Vlorës dhe Gjirit të Sarandës, në det të hapur dhe përgjatë vijës bregdetare Dhërmi–Himarë–Sarandë, këshillohen të mos dalin në det për shkak të kushteve të pafavorshme të motit.
Policia u bën thirrje drejtuesve të këtyre mjeteve të tregojnë kujdes maksimal, të marrin në konsideratë përkeqësimin e motit dhe të shmangin çdo dalje në det që mund të rrezikojë sigurinë e tyre dhe të personave në bord.
Gjithashtu, për shkak të motit të keq që pritet gjatë ditës së nesërme, Policia apelon edhe për kujdes të shtuar nga drejtuesit e automjeteve dhe motomjeteve. Ata duhet të respektojnë rregullat e qarkullimit rrugor, kufijtë e shpejtësisë, distancën e sigurisë dhe të shmangin manovrat e rrezikshme.
Edhe këmbësorët këshillohen të jenë të vëmendshëm gjatë lëvizjes, veçanërisht në zonat ku reshjet dhe lagështira mund të krijojnë vështirësi.
Policia e Shtetit thekson se respektimi i këtyre masave është thelbësor për mbrojtjen e jetës dhe rritjen e sigurisë, duke u bërë thirrje të gjithë përdoruesve të rrugës dhe mjeteve lundruese të tregojnë kujdes maksimal.
