Presidentja e parë grua në historinë e Gjermanisë? Kush është 61-vjeçarja që kandidon për postin e lartë të shtetit

Ilse Aigner ka shanse të mira për t’u bërë presidentja e parë grua në historinë e Gjermanisë.

Aktualisht presidente e Parlamentit të Bavarisë, 61-vjeçarja ka një karrierë të gjatë politike, me përvojë si në nivelin federal, ashtu edhe në atë rajonal.

Megjithatë, ndryshe nga shumë figura të tjera që kanë mbajtur poste të larta shtetërore, ajo nuk ka ndjekur rrugën tradicionale akademike dhe politike, raportojnë mediat gjermane.

E cilësuar si një politikane e afërt me qytetarët, e përulur dhe pa pretendime, Aigner njihet për komunikimin e drejtpërdrejtë me njerëzit dhe stilin e saj praktik.

Por pas këtij imazhi qëndron një karrierë e ndërtuar përmes përvojës, përballjes me krizat dhe angazhimit politik.

Në vitin 2008, Angela Merkel e emëroi Ilse Aigner ministre federale për Mbrojtjen e Konsumatorit, Ushqimin dhe Bujqësinë.

Ishte një periudhë e vështirë, e shoqëruar me disa kriza ushqimore në Gjermani, përfshirë epideminë EHEC të lidhur me lakrat e mbira, zbulimin e dioksinës në vezë dhe skandalin e mishit të kalit të përdorur në produkte të etiketuara si mish viçi.

Aigner u përball me këto situata duke ndërmarrë masa, duke negociuar në nivel europian dhe duke organizuar kompensime për fermerët e prekur.

Pavarësisht kritikave të opozitës, e cila e cilësoi si një ministre që bënte më shumë deklarata sesa veprime, ajo arriti të përballonte disa prej krizave më të vështira të mandatit të saj.

Në punën e saj të përditshme, Aigner u dallua edhe për qasjen praktike. Ajo promovonte nisma kundër shpërdorimit të ushqimit, duke këshilluar qytetarët se si të ripërdornin ushqimet e mbetura në shtëpi.

E lindur në Bavari, Aigner u rrit në një familje ku diskutimet për politikën dhe çështjet shoqërore ishin pjesë e përditshmërisë. Babai i saj ishte mjeshtër elektroteknik dhe anëtar i CSU-së në këshillin bashkiak të Feldkirchen-Westerham.

Në vitin 1990, kur babai i saj u largua nga detyra, Ilse Aigner u zgjodh këshilltare bashkiake, duke nisur kështu karrierën politike.

Një prej nismave të saj të para të suksesshme ishte krijimi i një autobusi nate, i njohur si “Rosenheimer Nachtexpress”, që transportonte të rinjtë nga fshatrat drejt qytetit të Rosenheimit. Shërbimi vazhdon të ekzistojë edhe sot.

Interesi për teknologjinë ishte një tjetër element që e shoqëroi që në fëmijëri. Aigner nuk ndoqi një rrugë tradicionale universitare, por u formua profesionalisht në fushën e elektronikës dhe më pas punoi në industrinë e helikopterëve, përpara se t’i kushtohej politikës.

Në vitin 1994, Aigner hyri në Parlamentin e Bavarisë, në të njëjtën kohë me Markus Söderin. Ndërsa Söder shihej si një nga figurat e afërta të Edmund Stoiberit, Aigner u konsiderua për një kohë si pasardhësja e mundshme politike e Horst Seehoferit.

Në vitin 2008, ajo pasoi Seehoferin në postin e ministres federale të Bujqësisë. Pesë vite më vonë, në vitin 2013, u rikthye në Bavari, ku Seehofer e emëroi ministre të Ekonomisë dhe zëvendëskryeministre.

Në atë periudhë, Aigner shihej si një prej emrave potencialë për të marrë drejtimin e qeverisë bavareze në vitin 2018.

Megjithatë, Markus Söder kishte krijuar tashmë mbështetjen e nevojshme brenda CSU-së dhe arriti të bëhej kryeministër i Bavarisë. Aigner mori drejtimin e Parlamentit të landit, detyrë që vazhdon ta mbajë.

Pavarësisht rivalitetit politik, të dy kanë ditur ta trajtojnë publikisht konkurrencën e tyre edhe me humor, duke u shfaqur në fotografi që ironizonin marrëdhënien mes tyre.

Si presidente e Parlamentit të Bavarisë, Aigner ka fituar respekt edhe përtej radhëve të partisë së saj. Ajo është angazhuar për dialogun me qytetarët, bashkëjetesën shoqërore dhe mbrojtjen e institucioneve demokratike.

Megjithatë, ndaj AfD-së ka mbajtur një qëndrim të prerë. Në një rast në Parlamentin e Bavarisë, ajo i ndërpreu mikrofonin drejtueses së grupit parlamentar të kësaj partie, Katrin Ebner-Steiner, pasi kjo e fundit nuk respektoi rregullat parlamentare.

Aigner është angazhuar gjithashtu në aktivitete përkujtimore dhe humanitare. Vizita e saj në Srebrenicë, ku takoi dhe përqafoi nënat e viktimave të masakrës, është një prej momenteve që mediat gjermane veçojnë në profilin e saj publik.

A do të bëhet presidentja e parë grua e Gjermanisë?

Kandidatura e Ilse Aigner për postin e presidentes federale është mbështetur nga drejtuesit e Unionit CDU/CSU, ndërsa emri i saj ka marrë sinjale pozitive edhe nga përfaqësues të forcave të tjera politike.

Zgjedhja e presidentit të ri gjerman është parashikuar të zhvillohet më 30 janar 2027, përmes Asamblesë Federale.

Nëse zgjidhet, Ilse Aigner do të hyjë në histori si gruaja e parë që merr postin e Presidentes Federale të Gjermanisë.