QËLLOI ME ARMË PRANË BANESËS SË ISH-BASHKËSHORTES, 22-VJEÇARJA: MË KËRCËNON SEPSE JAM NË NJË LIDHJE TË RE
Një 22-vjeçare nga Roskoveci, Aleksandra Elmazaj, denoncon kërcënimet e vazhdueshme që, sipas saj, ka marrë nga ish-bashkëshorti, Besmir Mustaj. E reja pretendon se ai ka qëlluar me armë zjarri pranë banesës së saj, ndërsa kërkon ndërhyrjen e policisë dhe drejtësisë, pasi shprehet se ka frikë për jetën e saj dhe të familjarëve.
Sipas dëshmisë së 22-vjeçares, ngjarja ka ndodhur rreth mesnatës, kur ish-bashkëshorti dyshohet se ka qëlluar me breshëri kallashnikovi pranë banesës dhe më pas është larguar.
Në mëngjes, Aleksandra thotë se ka konstatuar katër gëzhoja pranë portës së banesës. Pas këtij konstatimi, ajo ka njoftuar policinë, e cila ka mbërritur në vendngjarje, ka sekuestruar gëzhojat si prova materiale dhe ka marrë dëshminë e saj. Sipas informacionit të bërë publik, Besmir Mustaj është arrestuar nga policia.
E reja tregon se ajo dhe ish-bashkëshorti janë divorcuar me vendim gjykate dhe se kujdestaria e vajzës së tyre 6-vjeçare i është lënë asaj. Megjithatë, sipas pretendimeve të saj, kërcënimet kanë vijuar edhe pas divorcit, ndërsa ish-bashkëshorti i kërkonte të riktheheshin së bashku.
Aleksandra pretendon se shkak për kërcënimet është bërë edhe lidhja e saj e re sentimentale. Sipas saj, ish-bashkëshorti ka kërcënuar jo vetëm atë, por edhe personin me të cilin ajo është aktualisht në një lidhje.
22-vjeçarja jeton me motrën, ndërsa prindërit e saj ndodhen në emigracion, në Greqi. Ajo shprehet se ngjarja i ka traumatizuar dhe kërkon që autoritetet të marrin masa për të garantuar sigurinë e saj dhe të familjarëve.
Rasti ka ngritur shqetësime për sigurinë e të resë, ndërsa pretendimet e saj dhe rrethanat e ngjarjes do të trajtohen nga organet kompetente.
