Roja i plazhit dhe qytetarja shpëtojnë 70-vjeçarin në Seman, ndërhyrja e shpejtë i rikthen jetën pushuesit
Seman – Fier | Një pushues rreth 70 vjeç ka shpëtuar mrekullisht nga mbytja në plazhin e Semanit, falë ndërhyrjes së shpejtë të rojes së plazhit Klement Davidhi dhe një qytetareje, pronares së “Lezeti Beach”, e cila ndërhyri menjëherë pas nxjerrjes së tij nga deti.
Ngjarja ndodhi teksa 70-vjeçari, i cili po pushonte në plazhin e Semanit, u vu në vështirësi në ujë dhe rrezikoi seriozisht jetën.
Klement Davidhi, pjesë e “Rojeve të Plazheve Publike” të Bashkisë Fier, ndërhyri menjëherë dhe së bashku me rojet e tjera bëri të mundur nxjerrjen e pushuesit në breg.
Por situata ishte ende kritike. Pas nxjerrjes nga deti, 70-vjeçari kishte nevojë për ndërhyrje të menjëhershme. Në ato momente, në ndihmë të tij shkoi edhe një qytetare, pronarja e “Lezeti Beach” në Seman, e cila, me shpejtësi dhe guxim, kreu ndërhyrjen e nevojshme për t’i dhënë ndihmën e parë.
Falë reagimit të shpejtë të rojes së plazhit, qytetares dhe personave të tjerë që ndodheshin pranë, pushuesi arriti të rikthehej në jetë pas momentit të rëndë që kishte kaluar.
Pamjet e publikuara tregojnë momentet e ndërhyrjes dhe përpjekjet për t’i shpëtuar jetën 70-vjeçarit.
Rasti tregon edhe një herë rëndësinë e pranisë së rojeve të plazhit në zonat bregdetare, por edhe të reagimit të shpejtë të qytetarëve në raste emergjence.
Një apel për pushuesit: Në plazhet ku nuk ka roje plazhi, rreziku është shumë më i madh. Për sigurinë e tyre dhe të familjarëve, pushuesit duhet të zgjedhin zona të monitoruara dhe të tregojnë kujdes të veçantë gjatë qëndrimit në det.
