Kr*m pasioni në Greqi/ Burri i zuri pritë gruas poshtë pallatit të vajzës, më pas vr*u veten
Dy persona me origjinë shqiptare, një grua rreth 45 vjeç dhe një burrë, u gjetën të pajetë mëngjesin e kësaj të diele në hyrje të një pallati në Nea Smyrni, Greqi.
Sipas hetimeve paraprake të Departamentit të Vrasjeve, ngjarja dyshohet të jetë një krim pasioni, i përfunduar me vetëvrasjen e autorit.
Kamerat e sigurisë të pallatit kanë regjistruar momentet e ngjarjes. Nga pamjet dyshohet se burri i kishte ngritur pritë gruas. Sapo ajo mbërriti në hyrje të pallatit, ai e qëlloi me armë zjarri dhe më pas ktheu armën ndaj vetes.
Policia ka gjetur armën pranë trupave, ndërsa në vendngjarje janë dëgjuar dy të shtëna.
Gruaja nuk ishte banore e pallatit, por sipas të dhënave paraprake kishte shkuar për të vizituar vajzën e saj, e cila jeton në atë ndërtesë.
Autoritetet po hetojnë ende identitetin e plotë të viktimave dhe marrëdhënien mes tyre. Dyshohet se ata nuk ishin të martuar.
Hetuesit po analizojnë pamjet e kamerave, armën e gjetur në vendngjarje, provat balistike dhe rezultatet e mjekësisë ligjore për të zbardhur plotësisht motivin dhe rrethanat e tragjedisë.
