Tkurrja e Danubit nga nxehtësia ekstreme zbulon trupin e një flote të mbytur naziste dhe objekte antike
Nivelet rekord të ulëta të ujit në lumin Danub, të shkaktuara nga nxehtësia ekstreme dhe thatësira e kësaj vere, kanë nxjerrë në sipërfaqe mbetje tronditëse të historisë ushtarake të Evropës, duke ekspozuar të paktën 20 anije luftarake gjermane të Luftës së Dytë Botërore pranë Prahovos në Serbinë lindore.
Rrethanat e mbytjes së këtyre anijeve datojnë që nga shtatori i vitit 1944, kur forcat gjermane në tërheqje nën komandën e Kundëradmiralit Paul-Willy Zieb fundosën qëllimisht më shumë se 200 anije të Flotës së Detit të Zi për të bllokuar përparimin e Ushtrisë së Kuqe sovjetike.
Sot, trupat e ndryshkur dhe direkët e thyer po krijojnë pengesa serioze për lundrimin, pasi shumë prej tyre përmbajnë ende eksplozivë dhe municione të pashpërthyera. Planifikuesi i udhëtimeve lumore, Kenneth Reece, përshkroi përvojën e tij gjatë udhëtimit në Danub.
“Sot, mund të ulesh në kuvertën e një anijeje turistike lumore me një gotë verë dhe të shikosh këto vende të bukura duke kaluar, por i njëjti peizazh ka dëshmuar luftë, fashizëm, shtypje dhe vuajtje të jashtëzakonshme njerëzore. Danubi nuk na çonte thjesht përmes Evropës. Në shumë mënyra, ai na çonte përmes historisë së Evropës.”, shpjegon ai.
Përveç anijeve naziste, terrenet e thara të lumit kanë zbuluar pasuri të tjera historike dhe arkeologjike përgjatë rrjedhës së tij, duke përfshirë mbetjet e Urës së lashtë të Kostandinit në Bullgari, një bombë ajrore britanike në Sllovaki, si dhe fosile mamuthësh leshtorë që datojnë mijëra vjet më parë.
