Tragjedi e rëndë/ Mbërrijnë në Durrës trupat e pajetë të familjes Kola që humbi jetën nga monoksidi në Itali
Kanë mbërritur mëngjesin e sotëm në portin e Durrësit trupat e pajetë të katër anëtarëve të familjes Kola, të cilët humbën jetën tragjikisht më 4 shkurt në Itali.
Arti Kola, 48 vjeç, bashkëshortja e tij Jonida Kola, 43 vjeçe, si dhe dy fëmijët e tyre, Hadjar Kola, 22 vjeç, dhe Xhesika Kola, 15 vjeçe, u gjetën pa shenja jete në banesën e tyre në Porcari, provinca Lucca. Sipas autoriteteve italiane, shkak i vdekjes ka qenë helmimi nga monoksidi i karbonit.
Mediat italiane raportuan se gazi, i cili është pa erë dhe pa ngjyrë, i ka vrarë pa e kuptuar rrezikun. Sipas “La Repubblica”, djali 22-vjeçar dyshohet se ka qenë i fundit që është ndjerë keq dhe mendohet se ka telefonuar për të kërkuar ndihmë rreth orës së darkës.
Familja me origjinë nga fshati Gryksh i Madh, Peqin, jetonte prej vitesh në Itali. Arti Kola punonte si bojaxhi në një kompani, ndërsa bashkëshortja e tij ishte shtëpiake. Djali punonte si elektricist në një kompani private, ndërsa vajza ishte nxënëse shkolle.
Shtëpia ku ndodhi tragjedia ishte blerë rreth një vit e gjysmë më parë dhe familja ishte shpërngulur aty vetëm pesë muaj më parë. Bëhet me dije se kaldaja ishte e re, por ende nuk është e qartë kush e ka instaluar dhe nëse ishte kryer mirëmbajtje teknike. Hetimet e karabinierëve po përqendrohen pikërisht në këto elemente, ndërsa për shkakun e vdekjeve nuk ka dyshime.
Alarmi u dha nga vëllai i Arti Kolës, i cili hyri në banesë së bashku me karabinierët dhe fqinjët, duke zbuluar trupat e pajetë. Edhe ai ka pësuar helmim, ashtu si tre ushtarakë që ndërhynë për ndihmë, të cilët morën trajtim mjekësor për helmim të lehtë.
Një tragjedi që ka tronditur jo vetëm komunitetin shqiptar në Itali, por edhe qytetin e Peqinit, nga ku ishte familja Kola.
