Tragjedi në Margëlliç të Patosit/ Elektricisti humb jetën pasi rrëzohet bashkë me shtyllën elektrike
PATOS – Një ngjarje tragjike ka ndodhur në fshatin Margëlliç të Patosit, ku 46-vjeçari Ermal Debrova, elektricist, ka humbur jetën gjatë punës.
Sipas informacioneve paraprake, elektricisti ka qenë duke punuar në një shtyllë elektrike, e cila është rrëzuar duke e marrë me vete edhe punonjësin.
Në vendngjarje, FIERI WEB ka siguruar pamje ekskluzive, ku shihet shtylla pas rrëzimit. Sipas konstatimeve në terren, ajo rezulton se ishte futur vetëm rreth 60 centimetra në tokë dhe ishte mbuluar vetëm me dhe, duke ngritur pikëpyetje serioze mbi mënyrën e instalimit dhe sigurinë e punimeve.
Rrëzimi i shtyllës rezultoi fatal për 46-vjeçarin, i cili nuk mundi t’u mbijetojë plagëve të marra.
Tashmë pritet që hetimi të zbardhë nëse janë respektuar standardet e sigurisë në punë, kush ishte përgjegjës për vendosjen e shtyllës dhe nëse ka pasur shkelje apo neglizhencë që çuan në këtë tragjedi.
Kush mban përgjegjësi për jetën e një punonjësi që humbi jetën në vendin e punës? Përgjigjen pritet ta japë hetimi.
🎥 Pamje ekskluzive nga vendi i ngjarjes: FIERI WEB
