UEFA i jep “duart” edhe Gazprom, mbyll akordin me kompaninë ruse të gazit
Një nga vendimet e tjera të rëndësishme nga Komiteti Ekzekutiv i UEFA-s ishte edhe ndërprerja e kontratës së sponsorizimit me kompaninë Gazprom.
Siç dihet, Gazprom është kompania e madhe e gazit e kontrolluar nga shteti rus dhe UEFA, nën presion prej ditësh por që logjikisht pas 5 ditësh luftë vendosi që t’i jape duart kësaj kompanie duke mbyllur me efekt të menjëhershëm akordin që vlente 35 mln euro pothuajse në sezon.
Gazprom ishte sponsor i Champions League që prej vitit 2012 ndërkohë që sponsorizonte edhe kompeticione të tjera siç ishte Euro 2024.
“UEFA ka përfnduar sot parneritetin me Gazprom në të gjitha kompeticionet. Vendimi ka efekt të menjëhershëm me marrëveshjet ekzistuese duke përfshirë UEFA Champions League, ndeshjet e kombëtareve të UEFA-s dhe UEFA Euro 2024|”, lexohet në deklaratën e lëshuar nga UEFA.
Kujtojmë që ky vendim vjen i shoqëruar me goditjen e madhe që vetë UEFA bashkë me FIFA-n vendosën që Rusia të pezullohej nga çdo kompeticion futbollistik në të gjitha nivelet e këtij sporti.