Vetëm 15 ditë i lirë nga burgu, v*itet në pritë 55-vjeçari
Një ngjarje e rëndë është regjistruar mbrëmjen e djeshme në fshatin Xhafzotaj të Durrësit, ku 55-vjeçari Arben Tollia është vrarë me armë zjarri pranë banesës së tij.
Sipas burimeve nga Policia e Durrësit, viktima është qëlluar me breshëri automatiku teksa po kthehej në shtëpi, në afërsi të shkollës 9-vjeçare të fshatit. Dyshohet se autorët e kanë pritur për një kohë pranë zonës dhe në momentin që ai është afruar, një person ka zbritur nga një automjet dhe ka hapur zjarr në drejtim të tij.
55-vjeçari ka ndërruar jetë në vend si pasojë e plagëve të marra nga të shtënat.
Arben Tollia kishte dalë nga burgu vetëm 15 ditë më parë, pasi përfitonte nga amnistia, ndërsa rezulton i dënuar më herët për vepra penale të rënda, përfshirë përdhunim, sipas të dhënave të bëra publike.
Policia ka ngritur pika kontrolli në zonë dhe po vijon hetimet për identifikimin dhe kapjen e autorëve, si dhe zbardhjen e plotë të motivit të ngjarjes.
