VIDEO/ Shkeli perimetrin e sigurisë me gomone në Ksamil, gjobitet me 500 mijë lekë
Një drejtues gomoneje është ndëshkuar me gjobë prej 500.000 lekësh të rinj, pasi shkeli perimetrin e sigurisë detare në zonën e Gjirit të Hartës, në Ksamil, duke lundruar brenda hapësirës së rezervuar për pushuesit dhe duke rrezikuar jetën e tyre.
Sipas Policisë së Shtetit, shkelja u filmua nga qytetarët, të cilët e denoncuan menjëherë pranë autoriteteve. Pas reagimit të shpejtë të Policisë Kufitare dhe Njësisë Policore Detare, u bë i mundur identifikimi i drejtuesit, bllokimi i gomones dhe vendosja e masës administrative.
Policia Kufitare u bën thirrje të gjithë drejtuesve të mjeteve lundruese të respektojnë me rigorozitet perimetrin e sigurisë së plazheve dhe rregullat e lundrimit, duke paralajmëruar se çdo shkelje që rrezikon jetën dhe sigurinë e pushuesve do të ndëshkohet sipas legjislacionit në fuqi.
Ndërkohë, kontrollet intensive vijojnë në të gjitha zonat bregdetare për të garantuar sigurinë gjatë sezonit turistik.
Policia falënderon qytetarët për bashkëpunimin dhe denoncimet, të cilat ndihmojnë në reagimin e shpejtë ndaj çdo rasti që cenon sigurinë në plazhe.
