Vlora International Airport reagon pas bllokimit të rrugës: Nuk ka konflikt mes ortakëve
Shoqëria koncesionare Vlora International Airport (VIA) ka reaguar zyrtarisht lidhur me situatën e krijuar pas bllokimit të rrugës nga disa nënkontraktorë, duke sqaruar se ngjarja nuk ka asnjë lidhje me pretendimet për konflikt mes ortakëve të kompanisë.
Në njoftimin e saj, VIA thekson se bëhet fjalë ekskluzivisht për një marrëdhënie kontraktuale mes shoqërisë koncesionare dhe një prej kompanive të angazhuara në punimet ndërtimore të Aeroportit të Vlorës.
Sipas shoqërisë, kompania kontraktore ka rezultuar me vonesa të konsiderueshme në përmbushjen e detyrimeve të saj, në kundërshtim me afatet e përcaktuara në kontratë. Për këtë arsye, është vendosur ndërprerja e bashkëpunimit, në përputhje me kushtet kontraktuale.
“Çdo pretendim apo interpretim që e lidh këtë situatë me marrëdhëniet ndërmjet ortakëve është i pavërtetë dhe dezinformues”, thuhet në reagimin zyrtar.
Shoqëria koncesionare nënvizon gjithashtu se mbetet e angazhuar për vijimin e punimeve dhe realizimin e projektit të Aeroportit të Vlorës sipas standardeve, afateve dhe detyrimeve të përcaktuara.
