VLORË/ KAPET ME DOZA KOK*INE PRANË NJË SHKOLLE, ARRESTOHET 17-VJEÇARI
Një 17-vjeçar është arrestuar në Vlorë, pasi u kap në flagrancë pranë një shkolle, në lagjen “Pavarësia”, me doza kokaine që dyshohet se i posedonte me qëllim shitjen.
Sipas Policisë, gjatë momentit të ndalimit, i mituri ka kundërshtuar punonjësit e uniformave blu. Gjatë kontrollit fizik, atij iu gjetën dhe sekuestruan dozat e lëndës së dyshuar narkotike.
Arrestimi u krye në kuadër të operacionit policor “Shkolla të pastra”, që synon parandalimin dhe goditjen e shitjes së lëndëve narkotike pranë institucioneve arsimore.
Materialet procedurale i janë referuar Prokurorisë së Vlorës për veprat penale “Prodhimi dhe shitja e narkotikëve” dhe “Kundërshtimi i punonjësit të policisë së rendit publik”.
Policia bën me dije se kontrollet do të vijojnë në kuadër të këtij operacioni, me fokus zonat pranë shkollave dhe sigurinë e nxënësve.
