Personalitete të njohura nderohen me titullin “Doctor Honoris Causa”/ Rama: Ricardo Hausmann, mik besnik i Shqipërisë

Kryeministri Edi Rama mori pjesë sot në ceremoninë solemne të dhënies së titujve “Doctor Honoris Causa” për personalitete të njohura ndërkombëtare të së drejtës, akademisë dhe artit.

Në fjalën e tij, Rama theksoi rëndësinë e këtij eventi dhe të angazhimit ndërkombëtar të vendit, duke u shprehur se, “është privilegj që ne të jemi kryeqyteti pritës i Kongresit Botëror të Ligjit dhe më vjen shumë mirë që një vit përpara atij kongresi ne do të jemi së bashku nesër në një sesion të posaçëm, që është prelud i Kongresit, sipas traditës së kësaj platforme globale që mbledh njerëz të spikatur të botës së ligjit nga të gjitha kontinentet”.

Gjatë ceremonisë, kreu i qeverisë mbajti edhe një fjalë vlerësuese për ekonomistin e njohur ndërkombëtar Ricardo Hausmann, i cili u nderua me titullin “Doctor Honoris Causa”.

Rama theksoi rolin e tij në ndihmën ndaj vendeve për ndryshimet ekonomike.

“Ka shumë ekonomistë që bëjnë shpjegime pasi bota ndryshon dhe pastaj ka shumë pak ekonomistë të cilët i ndihmojnë vendet të ndryshojnë përpara se bota t’i vërë re. Profesori Ricardo Hausmann i takon kategorisë së dytë”, tha Rama.

Duke ndarë një episod personal, Rama tregoi fillimet e marrëdhënies me Hausmann, duke theksuar se përpjekjet e tij të hershme për ta kontaktuar kishin mbetur pa përgjigje.

“Marrëdhënia ime me Ricardon ka filluar si një dështim total. E kërkova pa sukses kur isha ende në opozitë; i shkrova atij dhe u përpoqa të gjeja mënyra për ta kontaktuar, për t’i thënë se Shqipëria ia vlente kohën e tij, por mora vetëm heshtje. Asgjë. Absolutisht asnjë lloj shenje”, tha Rama.

Ai shtoi se bashkëpunimi nisi vetëm pas ardhjes së tij në pushtet.

“Për të marrë vëmendjen e Ricardo Hausmann, në fillim duhet të fitosh zgjedhjet, që në retrospektivë mund të jetë procesi më i sofistikuar i vetingut. Kështu që sapo fitova, Ricardo erdhi”, u shpreh Rama.

Kryeministri vlerësoi qasjen praktike të Hausmann, duke e dalluar atë nga ekspertët e tjerë.

“Ai nuk erdhi si një ekspert që vjen në një vend në zhvillim me një prezantim në PowerPoint, por erdhi me çizme në terren. Kjo ka rëndësi, sepse vende si i yni kanë parë shumë ekspertë që përgatisin raporte që askush nuk i lexon dhe rekomandime tek të cilat askush nuk ka besim”, tha Rama.

Rektori i Universitetit të Tiranës, Artan Hoxha i dorëzoi titullin “Doctor Honoris Causa”, presidentit të Shoqatës Botërore të Juristëve, Javier Cremades.

Senati akademik i Universitetit të Tiranës në bazë të propozimit të paraqitur nga Fakulteti i Drejtësisë i jep Javier Cremades titullin “Doktor Honoris Causa”, me motivacionin: “Për kontribut të shquar në forcimin e shtetit të së drejtës promovimin e të të drejtave të njeriut, avancimin në bashkëpunimin juridik ndërkombëtar për përkushtimin e tij të vazhdueshëm dhe vizionin e qartë në përforcimin dhe konsolidimin e vlerave demokratike dhe në ndërtimin e institucioneve të qëndrueshme për rolin e tij të spikatur në fuqizimin e dialogut ndërkombëtar dhe në afirmimin e parimeve të drejtësisë dhe lirisë, si dhe për ndikimin e tij të veçantë në arenën ndërkombëtare dhe kontributin e çmuar në promovimin e Shqipërisë dhe në mbështetjen e proceseve të saj të forcimit të institucioneve dhe zhvillimit të demokaracisë”.

Duke falënderuar për marrjen e titullit “Doctor Honoris Causa”, Cremades u ndal tek perspektiva europiane e Shqipërisë.

“Të gjithë qytetarët shqiptarë janë entuziastë për demokracinë dhe po përpiqen shumë, ju keni një ëndërr, ju doni të jeni pjesë e BE-së. Ju po krijoni, po bëni diçka të fuqishme, sepse doni të transformoni vendin tuaj që ka qenë nën regjimin totalitar dhe doni t’i tregoni botës se tashmë jeni një vend demokratik. Po e bëni këtë, po punoni shumë”, tha ai.

Cremades u shpreh se “në Shqipëri kemi dy fokuse: të ndihmojmë brezat e rinj për shtetin e së drejtës, të mbajmë shpirtin gjallë dhe të përpiqemi që të mbrojmë trashëgiminë e të gjithë atyre brezave që kanë punuar shumë. Pika e dytë është të promovojmë dhe fuqizojmë gjithçka që bëhet këtu në Shqipëri”.

Më tej rektori i Universitetit të Tiranës, Artan Hoxha i dorëzoi titullin “Doctor Honoris Causa” akademikut dhe ekonomistit të famshëm, Ricardo Hausmann.

Ky titull iu akordua me motivacionin “Për kontributin e tij të shquar në pasqyrimin mendimit ekonomik bashkëkohor dhe në thellimin e kuptimit shkencor të proceseve të rritjes ekonomike, transformimit strukturor dhe politikëbërjes publike, për përkushtimin e tij të vazhduar për promovimin e prosperitetit përmes dijes dhe në forcimin e institucioneve, angazhimit të tij të drejtpërdrejt dhe bashkëpunimi me institucionet shqiptare”.

Në fjalën e tij Hausmann u shpreh se “gjithçka që keni ëndërruar për vendin tuaj do të bëhet realitet dhe për këtë jam i sigurt. Kam mësuar shumë gjëra në Shqipëri, kam mësuar shumë gjëra nga Edi Rama për lidershipin, për të gjitha ndërveprimet tona, ato që përfytyrojmë në politikat publike dhe avantazhet e formimit artistik kur bëhet fjalë për politikat”.