Operacion ndërkombëtar: Nga Italia në Shqipëri sillet i akuzuari për trafikimin e 932 kg kok*inë, dy të kërkuar ekstradohen në Gjermani dhe Britani
Policia e Shtetit ka finalizuar procedurat për disa ekstradime ndërkombëtare, në bashkëpunim me partnerët e huaj.
Nga Italia drejt Shqipërisë u ekstradua shtetasi Sueld Elezi, i shpallur në kërkim ndërkombëtar. Gjykata e Shkallës së Parë për Korrupsionin dhe Krimin e Organizuar, me vendimin e datës 30.04.2025, i kishte caktuar masën e sigurisë “Arrest në burg”, për veprat penale “Trafikimi i narkotikëve”, kryer në formën e grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale apo grupi i strukturuar kriminal”.
Sipas autoriteteve, Elezi akuzohet se gjatë vitit 2020, në bashkëpunim me persona të tjerë, ka trafikuar 2 kilogramë kokainë në Itali. Ndërsa gjatë vitit 2021, dyshohet se ka trafikuar 932 kilogramë kokainë, po në Itali, në bashkëpunim me shtetas të tjerë.
Ndërkohë, nga Shqipëria janë ekstraduar drejt vendeve përkatëse edhe dy shtetas të tjerë të kërkuar ndërkombëtarisht.
Në Gjermani u ekstradua shtetasi Roy Garin, 43 vjeç, banues në Izrael, pasi autoritetet gjermane kanë lëshuar urdhër arresti ndaj tij për veprat penale “Organizata kriminale” dhe “Mashtrimi me shuma të mëdha”, në 33 raste.
Po ashtu, në Mbretërinë e Bashkuar u ekstradua shtetasi Altin Shehu, 34 vjeç. Gjykata e Kentit të Veriut, me vendimin e datës 15.01.2026, i kishte caktuar masën e sigurisë “Arrest në burg” për veprën penale “Vrasja”.
