Anila Hoxha reagon për ngjarjen në Zvërnec: Policia private u soll si strukturë paramilitare
Gazetarja e njohur Anila Hoxha ka reaguar lidhur me incidentet e ndodhura gjatë protestës së zhvilluar në Zvërnec kundër projektit ndërtimor në zonë, duke ngritur shqetësime serioze mbi mënyrën e veprimit të punonjësve të sigurisë private.
Përmes një reagimi publik, Hoxha vlerësoi masat e marra ndaj drejtuesit të Policisë së Vlorës, por theksoi se ende mungon një qëndrim i qartë për personat që ndodheshin brenda rrethimit të objektit ku u zhvilluan tensionet.
Sipas saj, struktura e sigurisë private u soll si një formacion paramilitar, duke ndërhyrë ndaj protestuesve përtej kompetencave që parashikon ligji.
Duke iu referuar pamjeve video të publikuara nga vendngjarja, Hoxha deklaron se një qytetar është marrë me forcë dhe është mbajtur kundër vullnetit të tij brenda ambienteve private, ndërsa ka ngritur pikëpyetje edhe për përdorimin e sprajit ndaj protestuesve, si dhe për identitetin e personave të maskuar që shfaqen në pamje.
“Policia e Shtetit dhe Policia e Vlorës duhet të informojnë publikun me transparencë për atë që ndodhi brenda gardhit, jo vetëm për protestuesit që ndodheshin jashtë tij”, shprehet Hoxha në reagimin e saj.
Ajo kërkon sqarime urgjente nga autoritetet lidhur me pronësinë e zonës ku ndodhi përplasja, identitetin e personave të përfshirë dhe masat e marra pas incidentit.
Ngjarja ka shkaktuar reagime të shumta në opinionin publik, ndërsa hetimet për incidentin vijojnë.
