EKSKLUZIVE/ Flet për FieriWeb nëna e 15-vjeçares së përfshirë në dhu*imin e 17-vjeçares: “I kërkoj falje vajzës dhe familjes së saj”
Në një rrëfim ekskluziv për FieriWeb, nëna e njërës prej vajzave 15-vjeçare të përfshira në ngjarjen e rëndë të dhunimit të një 17-vjeçareje në Fier ka reaguar për herë të parë publikisht.
Me lot në sy, ajo i kërkon falje vajzës së dhunuar dhe familjes së saj, duke shprehur keqardhje të thellë për atë që ka ndodhur.
Nëna tregon se familja e mësoi ngjarjen fillimisht përmes mediave dhe më pas u paraqit në Policinë e Fierit për të dhënë shpjegimet përkatëse.
Sipas saj, vajza është diagnostikuar rreth tre muaj më parë me probleme të shëndetit mendor dhe familja kishte kërkuar vazhdimisht ndihmë pranë institucioneve për trajtimin e saj. Ajo pretendon se e bija kishte shfaqur edhe më herët episode agresiviteti, por nuk kanë marrë mbështetjen e nevojshme.
Nëna shprehet se, për shkak të kushteve të vështira ekonomike, familja nuk ka pasur mundësi të përballojë një trajtim të specializuar dhe u bën apel institucioneve shtetërore të ndërhyjnë për t’i siguruar vajzës kujdesin e nevojshëm mjekësor dhe psikologjik.
Ajo thekson se nuk kërkon të justifikojë veprimet e së bijës, por kërkon që, krahas përgjegjësisë ligjore për ngjarjen, të merret në konsideratë edhe gjendja e saj shëndetësore dhe nevoja për trajtim.
FieriWeb ka vendosur të mos publikojë identitetin e të miturave të përfshira në këtë rast, në respekt të ligjit dhe për mbrojtjen e interesit më të lartë të fëmijëve.
