Lëvizte i armatosur me pistoletë dhe granatë në Himarë, arrestohet 38-vjeçari me precedent penal
Policia e Vlorës ka arrestuar në flagrancë një 38-vjeçar, i cili u kap duke qarkulluar me automjet në Himarë i armatosur me një pistoletë me fishek në fole dhe një granatë.
Operacioni i koduar “Siguria 2”, i zhvilluar nga Komisariati i Policisë Himarë në bashkëpunim me Forcën e Posaçme “Shqiponja”, çoi në prangosjen e shtetasit me inicialet E. H., banues në Vlorë, i njohur nga policia për precedentë penalë për krime kundër personit.
Sipas policisë, 38-vjeçari u ndalua në zonën e njohur si “Kthesa e Pilurit”, ku gjatë kontrollit në çantën e tij u gjet një pistoletë me krehër të mbushur me fishekë dhe një granatë.
Kontrollet vijuan edhe në banesën e të arrestuarit në Vlorë, ku policia zbuloi një tjetër armë zjarri pistoletë, krehra, municion luftarak, dy jelekë antiplumb dhe dy jelekë multifunksionalë.
Në total u sekuestruan dy pistoleta, një granatë, municion luftarak, katër jelekë antiplumb/multifunksionalë, automjeti me të cilin lëvizte dhe dy telefona celularë.
Ndaj 38-vjeçarit rëndojnë akuzat për “Mbajtje pa leje dhe prodhim të armëve, armëve shpërthyese dhe municionit” si edhe “Mbajtje pa të drejtë e uniformës”, ndërsa materialet i janë referuar Prokurorisë së Vlorës për veprime të mëtejshme.
