SPAK çon në gjyq ish-kryebashkiakun e Divjakës, Fredi Kokoneshi, dhe tre ish-zyrtarë për shpërdorim detyre
Prokuroria e Posaçme kundër Korrupsionit dhe Krimit të Organizuar (SPAK) ka marrë të pandehur ish-kryebashkiakun e Divjakës, Fredi Kokoneshi, si edhe tre ish-zyrtarë të tjerë, duke i dërguar për gjykim nën akuzën e “shpërdorimit të detyrës”, kryer në bashkëpunim.
Dosja, e hetuar nga prokurori Elvin Gokaj, është depozituar në Gjykatën e Posaçme, ku pritet të hidhet shorti për caktimin e gjyqtarit të seancës paraprake.
Së bashku me Kokoneshin, të pandehur janë marrë edhe Andi Bullari, Ledio Xharo dhe Dorian Spaho.
Sipas hetimeve të SPAK, zyrtarët e Bashkisë Divjakë dyshohet se kanë kryer veprime në kundërshtim me ligjin gjatë procedurës së dhënies me qira të disa pasurive të përdorura për ndërtimin e impianteve fotovoltaike. Këto prona ishin dhënë me qira për një periudhë 10-vjeçare, ndërkohë që në regjistrat e Agjencisë Shtetërore të Kadastrës (ASHK) rezultonin të regjistruara si tokë bujqësore.
Çështja tashmë pritet të shqyrtohet në Gjykatën e Posaçme, e cila do të vendosë për kalimin ose jo të saj në gjykim.
