Aksident në rrethrrotullimin e Sharrës në Fier, automjeti përplaset me barrierat prej betoni
Një aksident rrugor është regjistruar pasditen e sotme në rrethrrotullimin e Sharrës, në Fier, ku një automjet ka humbur kontrollin dhe është përplasur me barrierat prej betoni të rrethrrotullimit.
Sipas informacioneve paraprake, fatmirësisht nuk ka persona të lënduar rëndë. Në momentin e mbërritjes së shërbimeve, drejtuesi i mjetit nuk ndodhej në vendngjarje. Disa dëshmitarë okularë bëjnë me dije se ai është larguar për të marrë ndihmë mjekësore, pasi dyshohet se ka pësuar lëndime të lehta.
Shkaqet e aksidentit mbeten ende të paqarta. Duke qenë se në atë orar qarkullimi ishte thuajse i papërfillshëm, një nga pistat paraprake është një defekt teknik i automjetit, i cili mund të jetë ndikuar edhe nga temperaturat ekstreme, qoftë në sistemin e frenimit apo në atë të drejtimit. Megjithatë, këto mbeten vetëm dyshime dhe pritet të konfirmohen nga hetimet zyrtare.
Policia ka nisur veprimet për zbardhjen e plotë të rrethanave të aksidentit, ndërsa pritet edhe komunikata zyrtare.
