Aksident tragjik në Gjermani, humbin jetën tre shqiptarë nga e njëjta familje
Një aksident i rëndë rrugor në Gjermani i ka marrë jetën tre anëtarëve të së njëjtës familje me origjinë nga Komogllava e Ferizajt, teksa po ktheheshin nga Kosova.
Sipas njoftimit të bërë publik nga bashkëvendasi i tyre, Qerim Rexhepi, viktimat janë Tahir Aliu (61 vjeç), djali i tij Gentian Aliu (34 vjeç) dhe Laurenti Aliu (16 vjeç).
“Me pikëllim të thellë ju njoftojmë se ka ndodhur një aksident me pasoja tragjike në Gjermani, duke u kthyer nga Kosova vëllezërit tanë. Kanë ndërruar jetë: vëllai i Remzi Aliut, Tahiri 61 vjeç, djali i Tahirit, Gentiani 34 vjeç, si dhe djali i Bardhylit, Laurenti 16 vjeç”, ka shkruar Rexhepi në rrjetet sociale.
Ai u ka shprehur ngushëllimet më të sinqerta familjarëve, të afërmve, banorëve të lagjes Nuhaj në Komogllavë dhe të gjithë atyre që janë prekur nga kjo tragjedi.
Deri në këto momente, autoritetet gjermane nuk kanë bërë publike rrethanat e aksidentit dhe hetimet për zbardhjen e plotë të ngjarjes vijojnë.
