Fier/ 1,268 masa administrative dhe 5 procedime penale në një javë, Policia Rrugore intensifikon kontrollet me pajisje inteligjente
Monitorimi intensiv në akset rrugore dhe në pikat hyrëse-dalëse të Fierit ka vijuar gjatë gjithë javës, me Policinë Rrugore që ka shtuar kontrollet me pajisje inteligjente për evidentimin në kohë të shkeljeve dhe parandalimin e aksidenteve. Shpejtësia e lartë, parakalimet e gabuara, drejtimi nën efektin e alkoolit dhe përdorimi i celularit vijojnë të jenë ndër shkeljet kryesore të konstatuara nga efektivët. Vetëm gjatë kësaj periudhe janë vendosur 1,268 masa administrative, ndërsa 5 drejtues mjetesh janë proceduar penalisht.
Kontrollet janë zhvilluar në rrugët urbane dhe lokale, në akset interurbane, si dhe në autostradën A2, me fokus kryesor shkeljet që konsiderohen burim i aksidenteve rrugore.
Gjatë kësaj jave, për shkelje të ndryshme të dispozitave të Kodit Rrugor, janë proceduar penalisht 5 shtetas. Dy prej tyre janë arrestuar në flagrancë për drejtim automjeti në gjendje të dehur ose pa leje drejtimi, ndërsa 3 drejtues të tjerë mjetesh janë proceduar penalisht në gjendje të lirë për drejtim automjeti pa leje drejtimi.
Në kuadër të kontrolleve parandaluese janë vendosur:
- 753 masa administrative për tejkalim të shpejtësisë;
- 22 masa për mospërdorim të rripit të sigurimit;
- 5 masa për përdorimin e celularit gjatë drejtimit të mjetit;
- 61 masa për parakalim të gabuar;
- 5 masa për drejtim automjeti nën efektin e alkoolit;
- 422 masa për shkelje të tjera të rregullave të qarkullimit rrugor.
Në total, numri i masave administrative të vendosura gjatë kësaj jave arrin në 1,268.
Gjithashtu, shërbimet e Policisë Rrugore Fier kanë sekuestruar 3 motomjete që qarkullonin pa dokumentacionin dhe targat përkatëse.
Policia Rrugore Fier apelon drejtuesit e mjeteve që të respektojnë në mënyrë rigoroze rregullat e qarkullimit, kufizimet e shpejtësisë dhe sinjalistikën rrugore, me qëllim parandalimin e aksidenteve dhe rritjen e sigurisë në rrugë.
Kontrollet do të vijojnë edhe në ditët në vijim në akset kryesore dhe në pikat hyrëse-dalëse të qarkut, me synimin për të garantuar një qarkullim të sigurt, të lirë dhe pa pengesa.
