Dhërmi/ Shiste kok*inë dhe kan*bis pranë beach bar-it, arrestohet 31-vjeçari nga Fieri
Policia e Vlorës ka finalizuar operacionin e koduar “Ruloti”, në kuadër të të cilit janë arrestuar në flagrancë dy persona të dyshuar për shitjen e lëndëve narkotike në zonën e Dhërmit.
Në pranga kanë rënë F. B., 31 vjeç, banues në Fier, dhe E. K., 27 vjeç, banues në Vlorë.
Dy të arrestuarit janë kapur në flagrancë nga shërbimet e Policisë në afërsi të një beach bar-i në fshatin Dhërmi, ku dyshohet se posedonin doza kokaine dhe Cannabis Sativa me qëllim shitjen.
Në vijim të operacionit, efektivët kanë ushtruar kontroll në automjetin e 31-vjeçarit nga Fieri, si dhe në rulotën ku ai qëndronte. Gjatë kontrollit janë gjetur dhe sekuestruar doza të tjera të lëndëve narkotike.
Në total, Policia ka sekuestruar rreth 150 doza të dyshuara kokainë dhe Cannabis Sativa, si dhe automjetin e 31-vjeçarit.
Operacioni u zhvillua nga Seksioni për Hetimin e Narkotikëve në DVP Vlorë, në bashkëpunim me Prokurorinë e Vlorës, pas administrimit të informacionit për një rast të shitjes së lëndëve narkotike në Dhërmi.
Materialet procedurale i janë referuar Prokurorisë për veprime të mëtejshme, për veprën penale “Prodhimi dhe shitja e narkotikëve”.
