Edi Reja e kishte projektuar titullar por Sokol Cikalleshi nuk do të jetë në fushën e lojës në ndeshjen kundër Polonisë. Sulmuesi kavajas është ndalur në mënyrë të papritur nga COVID-19, pasi ka rezultuar pozitiv në testet që i janë kryer ekipit si zakonisht një ditë para ndeshjes.
Futbollisti është larguar nga grumbullimi dhe ka nisur karantinimin, duke humbur mundësinë për të qenë pjesë e një ndeshje historike për Shqipërinë. Përtej keqardhjes, vetë ai duket se është i bindur se nata e nesërme do të jetë e paharrueshme, siç e tregoi me mesazhin që publikoi në rrjetet sociale.
“COVID-19 më ndaloi mua por kombëtaren kuqezi s’e ndalon kush”, ishin fjalët e Cikalleshit në postimin e tij, duke treguar bindjen e thellë që ka se Shqipëria do të sigurojë rezultat edhe përballë Polonisë.
